’n Handvol Genade.

Sy stryk oor die beddegoed. Kyk vir oulaas dat als in plek is, die wasskottel, die tafeltjie wat sy gedek het, sy slaapklere, die geurige blomme in die erdekruikie op die muurrakkie....

Sy gaan sit voor die venster, vou haar lang swart hare oor haar een skouer en begin dit rustig borsel. Dit was ‘n lang dag, ‘n ewige dag, ‘n jubel, jubel dag...

Sy het soos gewoonlik in stilte haar dagtakies verrig, hy het in stilte reggemaak vir sy diens by die tempel. Soos elke oggend het sy bot stilte teen haar aangedreun, haar aangekla, haar verpletter.

Twaalf  jaar lank nou al, die stilskreeuende verwyte ,die verwerping: Jy die  onreine! Twaalf jaar lank al wat sy stilswyend uitgil: Raak tog net aan my......

Later het Martha van langsaan uitasem kom sê, die Man van Nasaret, die Een wat hulle die Profeet noem is hier! En sy, die onreine, het agterna gestrompel.  Sy moes Hom net sien, moes weet of Hy waarlik is, wat almal fluister..... die  Messias, die Gesalfde van Adonai!

Gelukkig het Hy kort-kort stilgestaan, iemand aangeraak, ‘n lewe omskep, sy kon mettertyd nader beweeg.  Skuifeltreë, skugtertreë, toegevou in haar mantel.  As sy net met Hom kon praat, kon vra waarom....

Oneindig bewus van haar onreinheid het sy probeer om ongesiens deur die menseskare te beweeg. Nader en nader, sy kon later hoor hoe Hy lag!

Sy het voort geskuifel, angs en swakheid wou haar oorrompel, maar ’n groter drang het van haar besit geneem! As sy net aan Hom kon raak...

Maar sy weet sy durf nie, Hy die Godsgestuurde sou sy nie durf onrein maak nie! Om haar is daar ‘n gemaal van mense, bedelaars roep,  Sy dissipels vorm ’n kordon om Hom, en dan sien sy Hom...

’n Paar tree voor haar loop Hy en Jairus, sy sien dat Jairus ontsteld is, aanmekaar probeer om die Profeet aan te jaag. Deur haar waas hoor sy brokkies en stukkies van hulle gesprek, besef dat iemand..... Jairus se dogtertjie, sterwend is. Haar hart krimp, sy weet dit is sy enigste kind.  Sy snak, sal sy ooit.......

Maar dan glimlag sy, Hy is oppad na Jairus se huis, als sal regkom! Sy weet dat Jairus lankal glo in die Profeet, sy het hom  menigmaal in die koel aandlug op die dak van hul huis met haar man hoor redeneer. Gehoor hoe hy opgewonde vertel van die wonderwerke, dan het sy stilletjies aan die voet van die trap gaan sit en luister, honger vir nuus, want sy durf nie Sy naam in haar huis noem nie, durf nie praat oor die Verraaier nie....

Maar hier is Hy nou ’n paar tree voor haar, groot mans versper haar sig maar sy weet Hy is daar, sy hoor Hom, voel die ekstase in haar opstoot. As Hy net wil omdraai, as Hy haar sien sal Hy weet sy glo en dat sy Hom so nodig het.....

Sy struikel oor iets, voel hoe sy deur die skare vorentoe gestamp word, kom hard op haar knieë te lande. Op daardie oomblik buig die Profeet af om met ’n ou bedelaar te praat. Sy sien Sy tallith, sien hoe die tzitzit voor haar liggies heen en weer wieg op die maat van Sy bewegings...

“As ek net aan Sy Tallith kan raak, as ek net aan die tzitzit kan raak sal ek gesond word, sal ek nie meer onrein wees nie!”

Haar hand beweeg onwillekeurig vorentoe, huiwer,  en dan, met die suiwer wete dat Hy die Messias is, dat Hy die Een is wat haar kan heilig, gryp sy met haar laaste krag na die tzitzit, simbool van die Torah en deur haar dreun die gebed: Adonai, maak my rein, heilig my..........

Geskok slaan sy haar hande om haar buik, die pyn is weg! Besef onmiddelik dat die bloed ophou vloei het... Sy voel hoe krag deur haar stroom. Vervaard spring sy op, probeer uit die pad van die malende voete kom...

’n Stilte daal skielik op die skare as die Profeet Sy kop oplig en vra: “Wie het aan My klere geraak?” ’n Paar voortvarendes skree:”Ek!”,  terwyl die oorgrote meerderheid terugdeins, nie seker van die gesindheid agter die vraag nie. Al die dissipels praat gelyktydig, probeer die Meester oortuig dat die skare van alle kante teen Hom aangedruk het. Sy oë gly oor die skare, kom te ruste op haar verskrikte gesig.

Sy weet Hy weet...

Snikkend val sy voor Sy voete neer, vrees en blydskap ’n mengelmoes van emosies wat deur haar hart galop. Stotterend, babbelend verduidelik sy... Sy weet dat sy nie sin maak nie, onsamehangend vertel sy vir Hom van haar jare se pyn , vernedering, moedeloosheid, eensaamheid! Sy voel hoe Hy haar optrek, die growwe mantel wat haar moes vermom van haar aftrek.....

“Dis die priester se onrein vrou!” hoor sy iemand uitroep, beleef hoe almal wegdeins van haar af en dan word dit oneindig stil in haar as sy opkyk in Sy oë. Al die jare se vernedering val in daardie oomblik van haar af weg as sy die liefde in Sy oë beleef, toegevou word in die wete dat sy rein is in Sy heilige oë....

Sy hoor Sy helende woorde oor haar spoel: Jou geloof het jou gered, gaan in vrede, jy is genees!”

Sy staar Hom agterna, voel hoe die skare teen haar stamp as hulle by haar verbybeweeg. Hier en daar raak ’n vrouehand saggies, skugter aan haar....

Sy draf dansend huis toe, die mantel wat haar moes wegsteek snoesig om ’n dankbare bedelaar gevou. Haar hart jubel, haar lippe sing ’n loflied: Hoshannah in die hoogste hemel, Hoshannah Hy leef!

Sy plaas die borsel neer, kyk vir die soveelste maal verwonderd na haar bloesende  afbeelding in die spieël, stryk oor haar sterk, regop figuur, voel die borduurwerk van haar mooiste rok onder haar vingerpunte.....

Hy storm vervaard by die deur in. “Ek was by Jairus se huis, die Profeet het sy dogtertjie gesond gem...” Die woord hang stom in die lug, sy oë verstar, verwonder...

“Hy het my ook gesond gemaak, Baruch HaShem!”

Verwonderd kyk sy hoe hy naderkom, voel sy hoe hy haar gesig met sy groot hande omraam, hoor sy hoe hy snikkend dit op haar lippe uitjubel:

“Baruch Haba B’Shem Adonai, my vrou!”

Notas:

  Tallith – gebedsdoek van die Joodse mans

  Tzitzit – tossels aan die hoeke van die Tallith. Kyk Num 15:39

  Baruch HaShem – Geseënd is die Naam

 Baruch Haba B’Shem Adonai – Geseënd is Hy wat kom in die Naam van die Here.

Is jy 'n rivier of 'n kanaal?

Is jy ‘n rivier of ‘n kanaal?

Proverbs 21: 1:- The king’s heart is like channels of water in the hand of the Lord;


He turns it wherever He wishes.


Die wil van die koning staan onder die gesag van die Here;


soos ‘n stroom water lei Hy dit soos Hy dit verkies.




‘n Rivier en ‘n kanaal is albei “vervoermiddels” van water. Net so moet my lewe ‘n vervoermiddel wees van die Lewende Water. Vader het my daarop gewys dat ‘n rivier bekering voorstel en ‘n kanaal wedergeboorte.



Bekering beteken omdraai , wegdraai, op ‘n ander pad gaan. Ek bekeer my van my sonde, deur my rug daarop te draai en ‘n besluit te neem om dit nie weer te doen nie. Dit is gewoonlik ‘n verstands- of wilsbesluit.




Wedergeboorte daarteenoor beteken om opnuut gebore te word in ‘n ander familie in, die familie van God. Dit beteken dat jou natuur verander, jy word nou ‘n nuwe mens. (2 Kor 5: 17)


Hierdie is ‘n gees- of hartsbesluit.




Jy kan nooit wedergeboorte sonder bekering beleef nie maar jy kan wel bekering sonder wedergeboorte beleef.



Kom ons kyk na die kenmerke van ‘n rivierloop teenoor die van ‘n kanaal.




‘n Rivier het van nature klippe, plantreste, klein systrome, skeure in die walle en selfs maalkolke. Die rivierbedding is ook porieus, die water word opgesuig in die grond en vorm ‘n modder- en slyk neerlaag onder op die bodem. As daar volop water is vloei die stroom gemaklik maar sodra die watervlak laag is word die vloei baie traag of selfs gestuit.




‘n Kanaal daarteenoor is of ‘n gemaakte sloot of ‘n rivierloop wat omskep is in ‘n kanaal.


In die proses is die klippe uitgehaal, gate opgevul, takke en vuilis verwyder en die wande met sement gepleister. Selfs die walle word skoongemaak van plantmateriaal sodat die kanaal skoon kan bly. Alhoewel ‘n kanaal ook soms vuil kan word, veral as die water daarin min is, spoel klippe en takke makliker weg want daar is nie holtes en plantwortels waarin dit vassteek nie. Die water vloei meesal ongehinderd deur ‘n kanaal.




Albei die rivier en die kanaal se taak is om water te verskaf aan die omgewing, maar die kanaal het ‘n meer spesifiek doel. Dit is gerig op ‘n “Target”, en dit beweeg dus doelgerig in daardie rigting omdat die bouers dit so beplan het. ‘n Kanaal het ook ‘n bron vanwaar dit gevoed word.




‘n Rivier vloei min of meer soos die omstandighede dit toelaat, om die rotse, deur die valleie, dit vind die pad van minste weerstand. Erosie speel ook ‘n groot rol in die loop van ‘n rivier. Na ‘n stormvloed lyk ‘n rivier se topografie dikwels nie dieselfde nie. Die walle kalwe in, die oewer is onstabiel, daar is stroomversnellings en versperrings agv takke en vuilis. Al hierdie is faktore wat die watertoevoer benadeel, en alhoewel ‘n kanaal ook ‘n stortvloed kan beleef, bly die vorm, die afwerking van die kanaal dieselfde en soos genoem vloei dit wat versperrings kon veroorsaak maklik weg saam met die water.




Wat het dit alles met my as gelowige te doen?




JOH 3: 3 SÊ DAT EK WEERGEBORE MOET WEES ANDERS SAL EK DIE KONINKRYK VAN GOD NIE SIEN NIE EN OOK NIE INGAAN NIE.



Dit is nie genoeg om my net te bekeer van my verkeerde weë nie, ek moet weergebore word, ek moet nuut word, ek moet ‘n skoon en rein kanaal wees waardeur die Lewende Water, Yeshua Ha Mashiach – Jesus Christus, kan beweeg om die wêreld se dors te les.




As daar nie wedergeboorte was nie, as my lewe nie verander het nie, as ek doodeenvoudig aangaan met my lewe soos vantevore (na my bekering) en dit net toegooi met ‘n christelike sousie, is ek soos ‘n rivier, onstabiel, altyd op soek na die pad van minste weerstand in my geestelike lewe nog vol vleeslike sondes (takke en vullis), bind die vyand my nog in sy maalkolke van slawerny, word ek beheer deur my emosies en pyn (klippe) en is my gees troebel (modder en slyk).




Laat Vader toe om van jou ‘n kanaal te maak, met ‘n sterk fondasie (die Woord) en afgewerkte mure (spreek van heiligheid en toegewydheid).




Laat Hom toe om die klippe, vullis, en modder uit jou lewe te verwyder en die maalkolke toe te gooi met die sement van Sy liefde! Kry jou toevoer van die Bron van Lewende Water – Jesus self! Laat Hom, die Meesterbouer dan toe om jou vloei te rig op Sy “target” – ‘n wêreld daar buite wat vergaan van dors, jou gesin wat smag na Sy liefde, jou vriende wat vasgevang sit in ‘n dooie tradisie van rivierwees.


Daar is ‘n lied met die woorde:

Let it rain!

Let it rain!

Open the floodgates of heaven!

Let it flow!

Raak stil voor Sy troon en sing hierdie lied of bid hierdie woorde. Vra Hom om Sy Lewegewende Krag deur jou te laat vloei en van jou ‘n kanaal te maak wat sterk vloei, ‘n kanaal wat deur Hom gerig word.

Let it flow!

Ina van Vuuren

Hou die ape uit jou huis uit!!!!!

Ek glo hierdie titel het jou oë so effens laat rek, maar glo my dit is ’n kosbare stukkie raad uit die Koning se hand!

Vader wys my op ’n dag daarop dat ek nooit ape in my huis sal toelaat nie omdat ek weet dat hulle ‘Havoc” sal saai. Ek het dadelik daarmee saamgestem, dis mos logies, enigeen wat al die gemors en chaos moes aanskou wat ape kan veroorsaak glo ek sal dit met my eens wees: HOU DIE APE UIT JOU HUIS UIT!!!!

Ek kon egter nie verstaan wat dit met my te doene gehad het nie – ek bly nie op ’n plek waar daar ape is nie, so wat nou? Vader het toe maar ewe geduldig verduidelik :-

Net soos wat ape chaos veroorsaak in ’n huis, veroorsaak geestelike ape chaos in my geestelike huis....... Ek het dadelik die prentjie gekry!

Kom ons kyk eerstens na die geestelike ape. Enige negatiewe gedagtes bv vrees, twyfel, moedeloosheid, minderwaardigheid, bitterheid ens, ens, ens is vieslike, lelike ape – nie cute klein apies nie, groot, vet, harige monsters!
Laat jy hierdie ape in jou gedagtes toe het jy moeilikheid – hulle teel selfs vinniger aan as paashase, voor jy jou kom kry sit jy met ’n hele kolonie van hierdie vieslike goed!!

Het jy al ooit ’n aap probeer vang? Glo my, die blote gedagte daaraan maak my flou – dit is amper onmoontlik om ’n aap te vang, wat nog te sê ’n trop! So die beste raad ooit, is: HOU DIE APE UIT JOU HUIS UIT!!

Spreuke 4: 23 sê:- Wees veral versigtig met wat in jou hart aangaan
want dit bepaal jou hele lewe.

Besef jy dat jy maw ’n keuse het oor wat jy in jou hart bêre? Jy kan kies of jy kwaad gaan wees, seergemaak gaan wees, kleinserig gaan wees, minderwaardig gaan voel, jouself gaan bejammer, verwerp gaan voel .....
Ek glo jy wil nou dadelik vir my sê dat ek nie weet wat jy deurmaak of ervaar het nie, en ek wil sommer dadelik sê: Jy’s reg, ek weet nie, maar glo my ek het genoeg ape al moes rondjaag om myself ’n ervare aapvanger te noem....

In die proses het ek ’n paar truuks geleer omtrent aapvangery en ek deel dit graag met jou! Laat ek myself net eers in die rede val: as jy vir jare lank ’n sekere denkpatroon het, as jy jare en jare minderwaardig voel gaan dit ’n mini-oorlog kos om van hierdie ape (teen hierdie tyd gorillas) ontslae te raak, maar as jy begin verstaan dat jy keuses het, as jy die Koning toelaat om genesing in jou emosies te spreek is die eerste veldslag al gewen. Jy kan en moet verkieslik ’n aapvrye gedagtewêreld hê, daar kan vrede heers in jou emosies.

Kom ons gaan vang die ape!!

1. Die eerste ding wat die Koning my geleer het is dat die vyand se speelplek my siel is! Maar wat is my sielsdimensie? Dit is my gedagtes, my emosies en my denke! Joyce Meyer beskryf dit tereg as ‘n “Battlefield”! Dit is die plek waar ek in oorwinning staan of waar ek val! As ek besef dat die vyand my kan “floor” met my eie emosies kan ek begin terugveg maar so baie keer hou hy ons as’t ware gevange met ons eie onkunde, ons eie verlammende emosies.

2. Tweedens moes ek leer om net te reageer op dit wat ek wéét waarheid is. Die woord sê duidelik dat die satan die vader van die leuen is – HY KAN NIE DIE WAARHEID PRAAT NIE – en tog val ons telkemale vir sy leuens. Ons mors soveel kosbare energie deur te tob en swaar te kry oor goed wat ons “asume”! As Sannie jou nie groet by die kerk nie is jy in ’n toestand omdat sy vir jou kwaad is – intussen worstel sy dalk met ‘n ding of het jou doodeenvoudig nie raakgesien nie – of iets in die lyn. As jou man (of vrou of kind) laat tuis kom, kan jy begrafnis reël, hom in iemand anders se arms beleef of wat ookal, - of jy kan besluit dat jy nie die waarheid weet nie en daarom gaan kalm bly en solank met die Koning besig wees totdat jy wéét wat aangaan en dan daarvolgens reageer!


3. Noem elke aap by die naam! ’n Baie belangrike deel van emosionele gesondheid is om jou emosies te erken en herken. Jy kan “af” voel of jy kan “emosioneel” wees, of selfs ‘n “depro kap” soos die kids sê - jou hele lewe lank! Of jy kan beheer neem oor jou emosies deur elke emosie te erken, hom ’n naam te gee en dan daarmee te deel. Is jy gefrustreerd of is jy kwaad? Maak seker, daar is ’n verskil , weet jy? Backtrack so ’n bietjie, gaan kyk waar hierdie aap ingekom het en kyk hom dan in die oë. Die oomblik as hy ’n naam het begin jy outoriteit oor hom kry en MOET hy eventueel die knie buig en gaan! Gaan dit ’n geveg afgee? Verseker!!! Geen aap wat al jare lank in jou kop nesgeskop het gaan ewe gedwee sy plek afstaan nie! Maar wie is baas oor jou kop en jou hart? ’n Trop ape of die Koning en dus ook jy?

2 Kor 10: 5b:- Ons neem elke gedagte gevange om dit aan Christus gehoorsaam te maak.

Wie se werk is dit dus om die ape te vang? Myne natuurlik! Ek is verantwoordelik vir my binnekant! As ek gemors toelaat gaan daar gemors en chaos heers, as ek dit bedink wat rein is , edel is, mooi is, goed is( Fil 4:8) gaan daar vrede in my binneste wees, maak nie saak wat met my gebeur nie. Is dit maklik? Verseker nie! Maar glo my, as jy ’n keuse gemaak het om jou gedagtes, hart, verstand, alles aan die Koning oor te gee, as jy doelbewus die oorlogsveld betree raak jy gou-gou ’n aapvanger! (Nog ’n inskrywing op jou “heavenly” CV)

Laat alle ape hulle maklik vang? Verseker nie!!! Daar sal wel ’n paar wille, halstarriges wees (Halstarrig = half stadig) en dan kry jy natuurlik nog die hardnekkiges (ons chop hulle sommer met die Swaard van die Gees) ook, maar moenie moed opgee nie:

2 Kor 10: 4 sê:- Die wapens van ons stryd is nie die wapens van die mens nie, maar die KRAGTIGE WAPENS VAN GOD wat vestings kan vernietig!

Hoe deel jy met jou emosies?
Jy moet eerstens die emosie erken.
Besef dan dat elke negatiewe emosie ’n wortel het wat vrot is – die vyand het hom geplant - daar is niks goed daaraan nie! Moet ook nie dink jy kan hom afkap en klaarkry nie, gaan wortel toe, roei uit, vernietig die wortel.

As die wortel verwerping is, moet jy besef dat dit die vyand is wat jou wil vernietig. Jy moet dus die leuen van die vyand, dit wat jou verwerplik laat voel ,vernietig – maak nie saak wat wie oor jou gesê het nie, dit is wat God oor jou sê wat saak maak. (Ps 139, Joh 3: 16 ens) Vernietig daardie aap!

Nog twee ape.....
Het jy geweet dat selfbejammering sonde is?
Besef jy dat as jy skinder jy ’n aap of twee loslaat?

Rom 13: 14:- Laat ons dan die wapens van die Lig opneem.

Wat is hierdie wapens wat jy kan gebruik teen die ape, om genesing in jou emosies te kry?

Woord - vir elke negatiewe emosie is daar genoeg Skrif om hierdie aap weg te blaas! Spreek dit hardop uit en vernietig die vesting in jou gedagtes! Bv VREES (dit kom uit die vyand se hand uit), beveg hom met 2 Tim 1: 7:- Ek het nie ’n gees van vreesagtigheid nie maar van liefde, selfbeheersing en krag! Sê dit hardop! Spreek dit uit elke keer as jy vrees ervaar sodat jou hart dit kan hoor en begin glo en sodat die gees van vrees (daai ou vieslike aap) sy ry kan kry!
Ek het ’n kosbare vriendin wat die satan wegjaag met die woorde:- Hey, los my uit! Ek lees vir jou ’n Psalm!!!! Glo my hy staan nie lank genoeg stil om die woord te hoor nie. Vertrou my, geen aap hou daarvan om na psalms te luister nie, hy vlug liewer!

Vergifnis – Vergifnis is die mees bevrydenste handeling wat ek ken, dis die beste pynstiller en die grootste skild! As jy sukkel om te vergewe dra jy ‘n GROOT aap in jou hart saam en sommer een op jou rug ook! As jy vergewe (en vergewe, en vergewe) is daar ’n groot skild om jou wat die brandpyle wegkeer van jou hart!

Liefde – Liefde is die sterkste wapen wat jy ooit kan dra. Die geheim is om dit teen die vyand te gebruik en nie teenoor mense nie. As ek liefde gee, ten spyte van die feit dat ek seergemaak of verniel word trippel die vyand van woede ,en ek glo hy kners op sy tande – en daardie pentjie is genoeg om my aan te spoor om lief te hê! Die satan kan nie bly staan in ’n atmosfeer van liefde nie, hy haat dit! Hy vlug, dalk nie dadelik nie, maar eventueel moet hy gaan! 1 Cor 13: 6:- Love never fails. (NASB)
Is dit maklik om lief te hê as jy verniel word? Verseker nie!!!
Dit kos dat jy moet sterf aan jou vlees, jou idees, jou pyn, eintlik maar jou alles. En dit beteken verseker dat jy elke aap binne ’n duisend seemyl moet uitroei!

Jou anker – Hoop(’n vaste vertroue) in Yeshua Ha Mashiach, Jesus Christus is die anker van my siel. Sonder ’n anker dobber jy rond op die ontstuimige oseaan van jou emosies, maar as jou anker stewig aan die Rots geanker is kan jy staande bly! Hebr 6: 19.

Geloof – Geloof help jou om te veg teen die ape, dit help jou om nie te luister na die ape se vuil storietjies nie, dit help jou om die ape te vernietig want jy kies doelbewus om nie te kyk na wat jy sien nie maar om te kyk na dit wat jy glo!

Gaan jy toelaat dat ape jou vreugde steel, jou emosies bepaal, jou dag bepaal? Nee hoor, jy is ’n Koningskind! Jou erfenis is goed, jy is die kop en nie die stert nie, jy het outoriteit, jy het ’n keuse!

Jesus het gesê:-
John 14:27:- Do not let your hearts be troubled and do not be afraid.
(Stop allowing yourselves to be agitated and disturbed; and do not permit yourselves to be fearful and intimidated and cowardly and unsettled.)

Maw keer die ape voor hulle in jou huis inkom! Sluit die deur, maak toe die vensters, waak oor jou binnekant! Gebruik dit liewer as ’n plek van aanbidding... maak dit vol met lofprysing, Woord en die Koning se Teenwoordigheid!

Ons kan nog boeke vol skryf oor aapvangtegnieke, maar ek dink jy kry die boodskap:

HOU DIE APE UIT DIE HUIS UIT!!!

Koord van hoop

Haar vingers krul om die rooi gordynkoord......
Here, God! Kreun dit deur haar...

Ragab leun teen die koue klip muur. Sy staar afgetrokke na die Israeliete wat netjies in gelid voor haar kamervenster verby marsjeer. Dit is nou al die sesde maal vandag! Die afgelope ses dae het hulle slegs een maal elke dag om Jericho gemarsjeer, maar vandag is anders.... Die klank van die ramshorings skeur herhaaldelik deur die lug! Dis 'n senutergende klank, 'n klank wat jou wil mal maak! Ses dae nou al word alle ander geluide uitgedoof deur hierdie kermende, rou klanke. Haar pa sê dis die klank van bloed, of liewer, dis wat hy gesê het toe hy nog nugter was. Teen die derde dag wat hy dit oor en oor en oor gesê het, was sy maar te dankbaar toe hy sy vrees begin verdrink het. Haar ma lê op die bed, haar kop toegetrek, kermend, soms histeries.

Die ander mans, haar broers en swaers speel lusteloos 'n kaartspel. Kort- kort kyk een op en vloek in haar rigting, die vrouens sit morbied, ineengedoke, elkeen in haarself ingekrul, terwyl die kinders lusteloos aan 'n bak gebraaide koring peusel.

Ses dae lank al is die spanning in die huis onuithoudbaar maar vandag is dit eens te veel vir haar. Haar familie neem haar kwalik dat hulle hier soos gevangenes vasgekeer is. Toe die Israeliete die eerste dag die stad genader het, het sy die deur gesluit en die sleutel weggesteek, natuurlik tot almal se misnoeë! Haar pa en broers het selfs gedreig om haar by die venster uit te gooi! Sy sug, sy weet eintlik so min van hierdie God in wie se Hande sy haar en haar familie se lewens oorgegee het. Het sy hulle nie dalk juis verraai deur die rooi koord by die venster uit te hang nie? Sy is seker dit moet van 'n dagreis-ver af sigbaar wees. Genadiglik het nie een van die familie die tou raak gesien nie, sy kan net dink hoe hulle haar dan sou geskel het... Hierdie koord is ál wat haar verbind aan die belofte van die twee Israeliete, ál wat haar verbind aan hulle God! Dis haar tikvah, haar Hoop!

Maar kan sy werklik hierdie God vertrou? Hy weet nie eers van haar nie, sy is nie van Sy volk nie, sy is 'n onteerde, 'n uitgeworpene... Sy weet nie eers regtig wie Hy is nie! Al wat sy weet is dit wat sy by reisigers en van haar kliënte gehoor het, van hoe hierdie God wat hulle Yahweh noem Sy volk, die Israeliete uit Egipte gered het en hulle veertig jaar lank in die woestyn aan die lewe gehou het. Sê nou dit was alles bogpraatjies, versinsels, kampvuur-praatjies...

Ragab vee oor die nat spoortjie op haar wang, die hitte is ondraaglik, 'n stofwolk kleur die swaar lug, en die gedreun van marsjerende voete en kermende shofars gaan net aan en aan.... hoe lank nog? Here God, Yahweh, hoe lank nog?


"Molech help ons!" gil iemand histeries, en 'n kind kerm hoog en dun as die lug skielik geskeur word deur bloedstollende oorlogskrete uit derduisende Israelietiese kele! Onmiddelik word die wrede geluid aangevul deur die angsbevange gille van die inwoners en diere van Jericho! Die mans bestorm vloekend die deur, vrouens en kinders soek gillend wegkruipplek....

Ragab staan asof versteen by die venster, om haar heers daar 'n oorverdowende chaos! Binne-in haar is daar 'n eindelose stilte.......

Dit is tyd.....

Skielik begin die vloer onder haar voete skud, die mure kraak, kruike val om, stof dwarrel neer vanuit die dak... Sy kan die chaos ruik, hoor en sien, sy proe die stof, oral om haar val alles inmekaar! Die stadsmure tuimel inmekaar, reuse klippe reën neer op 'n wriemelende mensemassa. Sy voel hoe haar mond oopsper om te skree, maar geen geluid verlaat haar nie, haar vingers krul krampagtig om die rooi koord...

Elizabeth staar na die gordynkoord in haar hand... asof van ver af hoor sy die oorverdowende hartklop van Charl se woedende rockmusiek...
Dis hulle laaste aand in die huis. Marius lê dronk op die sitkamerbank, Karlien skilder met wanhopige hale, donker kleure in haar kamer... Dis verby, alles is verby!


Sy maak die venster oop, hang die koord na buite.

"Here God, Yahweh, Vandag sien ek net ruïnes, ek sien my stukkende, vernielde gesin, maar soos wat U Ragab uitgelei het uit die ruïnes, weet ek dat U my sál oplig, uitlei uit hierdie gemors.

U ìs die God van Israel, die God van Ragab én die God van Elizabeth! Ek kies om soos my oersuster my oë op U te rig. Om te glo, verby verwoesting te glo! Om te vertrou al sien ek net chaos!

Here Jesus, Yeshua my Verlosser, U is my Tikvah, my Hoop!"

"Ball ‘n chain"

Bitterheid is die wortel van alle kwaad.
Sorg dat niemand van die genade van God afvallig word nie. Sorg dat daar nie verbittering soos ‘n wortel uitspruit, moeilikheid veroorsaak en baie besmet nie.

Hebr 12: 15

10 Jan 2006
Vader het vanoggend vir my ‘n beeld gewys van ‘n outydse “ball ‘n chain”.
In die ou dae – ek klink soos een van my kinders! – is ‘n gevangene dikwels met sy gevangeneming aan ‘n “Ball ‘n chain” vasgemaak. Hierdie was ‘n kort ketting wat om die enkel vasgeklamp was en aan die ander punt van die ketting was ‘n swaar metaalbal. Die idee was dat die prisonier nie sou kon ontsnap nie, al was hy nie in ‘n sel nie.

Die bal was geweldig swaar en as die gevangene wou loop moes hy die swaar bal optel en dit dra.

Ek het eenmaal in ‘n museum so ‘n bal probeer optel, ek kon dit skaars roer.

Die klamp om die been het meesal verskriklike geinfekteerde sere veroorsaak en die ongelukkige feit is dat party gevangenes so swak was dat hulle maar op een plek moes bly lê en selfs soms in haglike omstandighede doodgegaan het omdat die bal hulle bewegings totaal beperk het.

Vader het my daarop gewys dat bitterheid soos hierdie “ball ‘n chain” werk. Die herinnering aan die omstandighede of persoon wat jou veronreg het, is die ketting en bitterheid is die metaalbal wat jy met jou saamsleep.

In “cartoons”kry ons soms ‘n baie grafiese prentjie van so ‘n mannetjie wat ‘n vreeslike swaar metaalbal saamsleep.

Omdat die ketting kort is – blykbaar net 10 skakels lank – is jy nooit werklik verlos van hierdie gewig nie. Dit is altyd half onder jou voete, nooit ver van jou af nie, dit beinvloed altyd alles wat jy doen. Net so met hierdie geestelike metaalbal van bitterheid. Die ergste van alles is dat hierdie metaalbal soos ‘n magneet werk.


Bitterheid oor een situasie veroorsaak dikwels dat ons verbitterd is oor ander dinge en mense ook, soms sommer oor alles, want die bitterheid wat ons in ons harte troetel maak dat ons alles deur die bril van hierdie bitterheid bekyk. Die metaalbal groei dus letterlik soos wat ons toelaat dat die bitterheid in ons harte groei – dink aan ‘n sneeubal wat al groter en groter word soos wat dit oor die sneeu rol!
Ek het op ‘n stadium ‘n vrou geken wat deur ‘n slegte egskeiding moes worstel. In die proses het sy so verbitterd geraak dat sy mense van haar af weggestoot het. Dié wat wou help het later moed opgegee want sy het net haat en bitterheid gebraak. Niemand wou haar eers meer op straat groet nie, want oor en oor moes jy die giftige storie aanhoor. Die hartseerste van als is dat sy haar pragtige kinders net so vergiftig het. Hulle is weggehou van hulle pappa en vol leuens en haat gepomp. Hierdie vrou, wat gelowig was, kon nooit die egskeiding verwerk nie. Sy dra tot vandag toe nog hierdie geweldige metaalbal, teen die tyd so groot soos Titanic, saam met haar. (En jy weet wat met Titanic gebeur het!)

Die Woord sê in Ef 4: 31, 32:- Moet NOOIT verbitter of opvlieënd wees of woedend word nie; moenie vloek of skel nie; moet niks doen wat sleg is nie. Wees goedgesind en hartlik teenoor mekaar en Vergewe mekaar, soos God julle ook in Christus vergewe het!

Spr 4: 23 sê Wees veral versigtig met wat in jou hart omgaan, want DIT bepaal jou HELE LEWE.

Vader is baie duidelik as Hy sê – moet NOOIT verbitter wees nie want Hy weet dat dit vir die vyand ‘n wapen gee waarmee hy ons gevange kan hou, want dit is presies wat JY is – ‘n GEVANGENE! Nie die ou vir wie jy kwaad is nie, JY!

Matt 6: 14 is baie duidelik: As julle ander mense hulle oortredings vergewe, sal julle hemelse Vader julle ook vergewe. Maar as julle ander mense nie vergewe nie, sal julle Vader julle ook nie JULLE oortredings vergewe nie!

Dit behoort ‘n redelike skok te wees as jy en Jan, teenoor wie jy ‘n wrok koester, gelyk voor Vader se genadetroon verskyn en Hy Jan toelaat in Sy Koninkryk, omdat Jan met ‘n hart vol berou om vergiffenis gepleit het. En vir jou, teenoor wie so ‘n verskriklike onreg gepleeg is, moet Hy dalk sê: Ek is jammer My kind maar Ek kan nie teen My Woord gaan nie!

Vader sê vandag vir ons: Gooi af daai gewigte wat julle so saam sleep!

My Seun het vir al jou pyn gesterf (Jes 53: 4).
Kom vry van al die bande waarmee die vyand jou wil bind! (Joh 8: 36).
Ek wil hê jy moet dans op die wind (Ps 150 : 4).
Ek wil hê jy moet vry wees en bokspring soos ‘n vetgemaakte kalf (Mal 4:2).
Ek wil saam met jou oor ‘n muur spring

(Ps 18: 30).
Ek wil vir jou voete gee soos dié van ‘n ribbok, sodat jy op die hoë plekke kan trippel (Hab 3:19),
sodat Ons die satan onder jou voete kan verpletter (Rom 16: 20)!

Hoe raak ons ontslae van hierdie “ball ‘n chain”? Vergifnis is die sleutel wat daardie vreeslike klamp om jou enkel losmaak!

Wil jy nie saam met my ‘n gebed doen om hierdie goue sleuteltjie te draai sodat jy kan vry kom nie?


Vader, U weet wat …….. aan my gedoen het. U weet van die verskriklike pyn wat dit in my veroorsaak het. Vader, ek wil nie meer vasgebind word deur hierdie pyn en verbittering nie, help my asb om ….. volkome te vergewe. Ek kies om Jesus se voorbeeld te volg en om dié wat teen my oortree het te vergewe. Ek weet ook dat as ek …… vergewe die vyand my nie langer in kettings kan hou nie, maar dat ek vry sal wees om te lewe soos wat U vir my bedoel het. Dankie dat U my vrymaak van verbittering en haat, ek bely ook my woede en die wraakgedagtes wat ek gekoester het. Dankie dat U Woord sê dat as U Seun my vry gemaak het is ek waarlik vry. Ek loof U Naam! Amen.


Moontlik is jy verbitterd teenoor God omdat Hy sekere dinge in jou lewe toegelaat het. Ons lewe in ‘n siek wêreld en slegte dinge gebeur met ons. Soms is dit agv ons eie sonde dat ons vrot vrugte pluk, ander kere is ons heeltemal onskuldige slagoffers. Die feit is egter dat Vader die slegte dinge wat met ons gebeur wil omdraai in iets moois. Al wat Hy vra is dat ons dit in Sy hande moet sit. Dwarsoor die wêreld is die ouens met die kragtigste getuienisse dié wat deur slegte, moeilike tye gegaan het. Vader sê dat Hy ALLES ten goede laat meewerk vir hulle wat Hom liefhet (Rom 8:28). As ons dit altyd voor oë hou weet ons dat Hy daardie swaar ysterbal kan omskep in ‘n visnet waarmee ons ‘n klomp visse vir die Koninkryk kan inbring.

Ek en jy het ‘n keuse! Ons kan ligvoets dans op maat van die Oorwinningslied of ons kan die Titanic agter ons aansleep! (en dalk na die bodem van die see gesleep word in die proses!)